Вход
Запись

Мәриямның ұлы Исаның қайта оралуы






   «МӘРИЯМ ЖӘНЕ ОНЫҢ ҰЛЫНА» ҚАТЫСТЫ ҚҰРАНДАҒЫ ПЕРДЕЛЕНГЕН МЫСАЛ

   Енді, Мәриям мен Иса (оларға Алланың сәлемі болсын) Құранда мысал ретінде келтірілген бе, - соны қарастырып көрелік. Құранның келесі суреттемесіне назар аударыңыздар:


   «Алла иман келтірмегендерге Нұх пен Лұттың әйелдерін мысалға келтіреді. Олар Біздің екі салиқалы құлдарымызбен (некелі) болған, екеуі де (яғни, екі әйел де) оларға (Нұх пен Лұтқа) опасыздық етті. Бірақ, олардың күйеулері оларды Алладан қорғай алмады. Оларға: «Тозаққа кіргендермен бірге сендер де кіріңдер», – делінді. 

   Ал иман келтіргендерге, Алла, перғауынның әйелін мысалға келтіреді, ол: «Йә Раббым! Жәннатта маған Өзіңнің жаныңнан үй салып бер, әрі мені перғауыннан, оның істерінен құтқар, және мені залым қауымнан құтқар», – деген.    

   Сондай-ақ, Имранның қызы Мәриямды да (мысалға келтіреді). Ол абыройын сақтаған еді, сонда Біз оған (еркекке) Рухымыздан үрледік. Ол Раббының Сөздерін және Оның Кітаптарын растады және ол (Аллаға) бойұсынушылардан болды». («Әт-Тахрим» сүресі 66:10-12)

   Назар аударыңыздар, соңғы 12-ші аятта Мәриям анамыз иман келтірген момындарға, яғни мүмін еркектер мен мүмін әйелдерге мысал ретінде келтірілген. Сондықтанда, сол аятта әрі қарай «Біз оған (еркекке) Рухымыздан үрледік» деген жерде – «Мәриямның» жынысы еркекке айтылғандай сипатталады. Егер үйіңіздегі Құран аудармасы бұл ерекшелікті ашпай тұрса, онда сол аяттың арабша мәтініне назар аударыңыз. Бұның дәлелі, «фанафахнаа фийһи» делінген жердегі, «Фийһи» сөзінде.
   Мәриям анамыздың Исаға босанғандағы рухани арпалысы қандай болғаны Құраннан білгілі. Құранның 19-шы сүресінде, Мәриям өз-өзің Раббысына арнап, Оған қызмет ету үшін адамдардан тысқары кеткені жайында айтылады. Сол жақта, ол, пәк күйінде Иса Мәсіхке жүкті болғанынан хабар алды. Сосын Құранның «Әл-Әнбия» (21) сүресінің 91-ші аятында былай делінеді:



   «Және абыройын сақтаған (Мәриямды) еске ал. Біз оған (әйел затына) Рухымыздан үрледік, әрі өзін де, ұлын да барша ғаламға белгі еттік».

   Мұнда, «фанафахнаа фийһа», яғни «оған (әйел затына) үрледік» - делінген. Басқаша сөзбен айтқанда, бұл жерде «Фийһа» - әйел жынысты Мәриямның (ә.с.) өзі сөз етіледі. Ал, әт-Тахрим (66) сүресінің 12-ші аятындағы «Фийһи» сөзі, «Мәриям» ретінде мысалға алынған еркек мүмінге айтылған.
   Бұның түсіндімесі: Мәсіхке босанған Мәриямды Құран Кәрім иман келтірген мүмін ерлерге де мысал ретінде келтіргенін ескерсек, бұл жерде мынадай шешім шығарылады: Көктің ойластырған жоспары бойынша, Мәриям анамыздың жүріп өткен рухани жолы іспетті, Құдайдың таңдаулы адамдары пайғамбар дәрежесіне жетерден бұрын, олар дүниеден безіп, өздерін толығымен Алла Тағалаға қызмет етуге арнайды, сөйтіп Алланың жіберген Рухымен рухтанады. Тек содан кейін олар пайғамбарлық дәрежеге жетеді (яғни, символды түрде «Исаға» айналады), тек содан кейін олар әлемге ізгі хабарларын жеткізе бастайды. 
   Сахих Әл-Бұхаридің «Нәбилер Кітабында» Әбу Һурайра (оған Алла разы болсын) риуаят еткен бір хадис бар, ол әт-Тахрим сүресінің 12-ші аятымен бетеңе ұштасады және әлгі түсіндірмемізді құптайды. Бұл хадис Сүйікті Пайғамбарымыз Мұхаммедтің (ол кісіге Алланың игілігі мен сәлемі болсын) 3:36 Құран аятына келтірген тәпсірі болып табылады, онда Мәриямның туылуы жайында, сосын анасы оны және оның ұрпағын Құдайға арнап, сайтаннан сақтасын деген дұғасы жайында айтылған. Алланың Елшісінің (оған Алланың игілігі мен сәлемі болсын) айтқанын естідім деп, Әбу Һурайра (р.а.) баяндайды: 

   «Әр адам баласы дүниеге келгенде оны сайтан түртеді. Сайтанның түртпегінен бала айғайлай бастайды, бірақ Мәриям мен оның ұлына қатысты жағдайда ғана бұлай болмайды».

   Егер осы айтылған сөздерді тура мағынада түсінетін болсақ, яғни Мәриям мен оның ұлын ғана сайтан түрте алмайды, ал басқа адамдардың барлығын түртпектейді десек, онда сайтанның түртпегінен тіпті біздің Мұхаммед Пайғамбарымыз да ﷺ, Құдай сақтасын, қорғалмаған болып шығады. Күллі әлемге мейірім болып келген  Ардақты Пайғамбарымыз Мұхаммедтің ﷺ дәрежесі пайғамбарлардың ішіндегі ең биік дәреже, яғни ол -  «барша Пайғамбарлардың Мөрі», бұл дәрежеге одан бұрын ешкім жетпеген, одан кейін де ешкім жетпейді. Демек, әлгі хадистің сөздерін тура мағынада түсінуге болмайды. Сондықтан, бұл жерде перделі мағынаны іздеген дұрыс. Бұндағы «Мәриямның ұлы» деген сөз Алланың барша пайғамбарларын меңзейді, яғни олар, «Мәриямның пәк күйінде жүкті болып, Исаға босанғаны» секілді, рухани ұқсастықтың шынына жеткен-ді. Қысқаша айтқанда, олар дүниеден баскешіп, Раббысымен үзбей байланыс орнату үшін, ғибадат ету үшін қашық жерге барып оңашаланады. Сөйтіп, күндердің бірінде, оларға Алланың қалауымен Рух түсіріледі. Құранның «Әл-Кашшааф» атты тәпсір кітабының авторы Имам Әл-Замахшари әлгі хадистің осындай түсіндірмесімен келіседі. Келесі дерек те осы түсіндірмені растайды. Бұл урду тілінде жазылған «Ирфан» деген кітаптың (207-ші бетіндегі) үзіндісінің аудармасы. Кітаптың авторы Ислами ғұлама Фақир Мұхаммед Нұр Сарвари Қадри, ол 17-ші ғасырдың атақты сопысы Сұлтан Бахудың ізбасары болған. 

   «Сонымен, Алла Тағала Мұхаммед Пайғамбардың кеудесінде Құран Кәрімнің шамшырағын жақты. Шамшырақтың жап-жарық болғаны сондайлық, Пайғамбарға түсіріліп жатқан қасиетті уахилар оны (рухани түрде) ұрықтандырып жатқанын ол терең сезіне білді. Басқаша айтқанда, ол өз ішінде өсіп келе жатқан рухани ұрықты көтерді, осылайша, Мәриям секілді (рухани түрде) жүкті болды. [Бұл жерде автор Құранның 19:22 аятын келтіреді, онда Мәриям адамдардан оңаша жерге барып, Исаға жүкті болғаны жайында айтылған.] Сосын Ардақты Пайғамбар адамдардың күйбін тірлігінен алыстап, Хира үңгіріне барып оңашаланды. Ол сол жерде, жалғыздықта, рухани ұрықтанудың нәтижесін тосты, яғни (рухани түрдегі) толғағын күтті. Пайғамбарымыз өзінде рухани Исаны тудыру үшін, үнгірге жиі барып жүрді».




   МӘСИХШІЛІК ҰҚСАСТЫҚТАР



   Сондай-ақ, «Мәриямның ұлы келеді» деген терминология: пайғамбарлық егінді жинау мысалындағы перделі түсіндірмені ғана білдірмейді, сонымен қатар, бағзы заманда өмір сүрген исраилдік Мәсіх пен мұсылман үмметіне уәде етілген Мәсіхтің (оларға Алланың сәлемі болғай) мәсихшілік ұқсастықтарын да көрсетеді. Мәселені осы  қырдан қарастырардың алдында, Ардақты Пайғамбарымыздың ﷺ мына бір хадисін назарларыңызға ұсынамыз, онда: кейін мұсылман үмметі міндетті түрде Мұсаның (ә.с.) үмметінен аумай қалады  делінген. Бұл «Сахих Ситадағы» Әт-Термезидің жинағындағы аса танымал хадис. («Иман Кітабы», 19 тарау, 26 бет). Алланың Елшісі (оған Алланың игілігі мен сәлемі болсын) былай деген:

   «Бұрындары яһудилер қандай жағдайларға ұшыраса, әлбетте, менің үмметім де дәл сондай жағдайларға ұшырайды, олар етіктің екі сыңарындай бір-бірінен аумай қалады. Олардың ұқсастықтары сондайлық болмақ, тіпті егер яһудилердің бірі өз анасымен зина жасаған болса,  онда менің үмметімнен де соны істейтін сорлы табылар, сірә. Яһудилер 72 ағымға бөлінді. Менің үмметім 73 ағымға бөлінеді, олардың барлығы Отқа тасталады, тек біреуінен басқалары – олар (құтылған жамағат) маған және сахабаларыма ұқсайды».

   Төменде екі Мәсіхтің, яғни: Назареттік Иса (ә.с.) мен Қадиандық Ғұләм Ахмедтің (ә.с.) салыстырмалы ұқсастықтары келтірілген:

1. Иса пайғамбар (ә.с.) Мәсіх ретінде Мұсаның (ә.с.) шариғатына шамамен 1300 жылдан кейін келген. Мырза Ғұләм Ахмед те (ә.с.) Мәсіх ретінде Мұхаммедтің ﷺ шариғатына шамамен 1300 жылдан кейін келген.

2. Екеуі де өз орталарына мәшһүр әрі белсенді ұстаздық еткен тұлғалар. Бірі яһудилік Рәби болса, екіншісі мұсылмандық Имам болған.

3. Екі Мәсіх те, өз үмметтері 70-тен астам ағымға бөлінген кезде келген.

4. Екі Мәсіх те, өз заманындағы діни ғұламалардың (яғни, біріншісі раввиндердің, ал екіншісі молдалардың) қатты қарсылаушылығына тап болған, және екеуі де, олардың тарапынан - «жалған Мәсіх» атанды. Өз кезегінде раввиндер мен молдалар, өз Мәсіхтерінің абыройын түсіру үшін түрлі жалалар құрастырып, ғайбатты сөздер таратумен әлек болды. Хижра бойынша 6-шы ғасырда өмір сүрген әйгілі сопы Мұхийддин ибн Араби, өзінің танымал «Футухат әл-Мәкийя» еңбегінде, былай жазады: «Имам Маһди келгенде, сол кездің мұсылман ғұламалары оның қас дұшпандарына айналады».

5. Пайғамбарлықтарды тура мағынада түсінген Яһуди және Мұсылман ғұламаларының пікірі бойынша: олардың Мәсіхтері міндетті түрде дүнияуи патша бейнесінде келеді және дүниелік патшалықты құрады екен. Сосын, Мәсіх олар үшін қылыштың күшімен дүниежүзін жаулап алады да, оларды жердің қожайындары етіп тағайындайды-міс. Бірақ, осы секілді пайғамбарлықтарды тым үстірт қабылдаған яһудилерді кезінде Хазірет Иса (ә.с.) қатты сынаған болатын. Өйткені Хазірет Иса (ә.с.) ешуақытта дүниелік патшалықты уағыздаған емес, керісінше оның уағыздары Рухани Патшалық жайында болған; және осыған қатысты мазақы айыптарға Иса (ә.с.): «Менің Патшалығым бұ дүниелік емес» - деп жауап қайырған. (Інжіл Жоханнан 18:36).
   Сол секілді Хазірет Мырза Ғұләм Ахмед те (ә.с.), өз халифатын - дүниелік халифат емес, Рухани Халифат деп уағыз еткен. 

6. Екі Мәсіх те, өз үмметтеріне: қару көтермеңдер, зорлыққа негізделген барлық идеологиялардан бас тартыңдар – деп, насихат жасаған. Яһуди ғұламалары мен Мұсылман ғұламалары бұндай насихатты құлақтарына да ілмеді, одан үзілді-кесілді бас тартты.

7. Екі Мәсіх пен олардың ізбасарлары қатыгез қудалаушылықтардың алдында ерекше төзімділік таныта білді, және зорлыққа зорлықпен жауап бермеді. Зұлымдықтан қорғаныс іздеу үшін, екі Мәсіх те дұғаның көмегіне жүгініп, Құдіреті күшті Құдай Тағаламен үзбей байланыс орнатуды үйреткен. 
   Хазірет Исаның (ә.с.) бірінші ізбасарлары қудалаушылыққа ұшыраған кезде, олар Исаның (ә.с.) келесі тәліміне амал еткен: «егер біреу жағыңнан ұрса, екінші жағыңды төсе».
   2010-шы жылы мамырдың 28-інде Пәкістанның Лахор қаласында, жұма намазы кезінде, содырлардың тарапынан жасалған террористік шабуылдан, екі Ахмадия Мешіттерінде 96 ахмади-мұсылманы шейт болған еді. Сонда Ахмадия Мұсылман Жамағатының Халифасы: ешқандай кек алушылық болмайды – деп, жарлық етті. Сол шабуылдар кезінде ахмади-мұсылмандары бір қылмыскер-террористті қолға түсіріп қарусыздандырды, және оны сау күйінде полицияның қолына тапсырған болатын. 

8. Иса пайғамбардың: «мен Құдайдың ұлымын» - деген талабын, Яһуди ғұламалары келесі тұрғыда қарастырды, яғни: ол сонысымен Мұса пайғамбардың дәрежесін көлеңкелемек болды, одан өзін асырғысы келді-міс.
   Мырза Ғұләм Ахмедтің пайғамбарлыққа жасаған талабын, Мұсылман молдалары да сол секілді қарастырды, яғни: ол сонысымен (жаңа шариғат кітабын әкелген) тәуелсіз пайғамбарлыққа кезенді, сөйтіп Мұхаммед Пайғамбарды ﷺ өз беделімен ауыстырмақ болды-міс. Алайда, екі Мәсіх те бұндай жалаларды өтірікке шығарған.

9. Яһуди және Мұсылман ғұламалары өз Мәсіхтерін өлтірмек болып түрлі шаралар қолданды. Алайда, олардың қаскүнем пиғылдары әрдайым сәтсіздікке ұшырап отырды.

10. Яһуди раввиндері және Мұсылман молдалары өз Мәсіхтерінің абыройын түсіру үшін және олардың Құдайдан келген Мәсіх екендіктерін жоққа шығару мақсатында, оларға «лағнетті өліммен өлген» деген айып таққан; яғни, қалайша Құдай Тағала шын Мәсіхті лағнетті өліммен өлтірткен? – дегендей. Яһудилердің айыптауы бойынша, Хазірет Иса (ә.с.) айқышта мерт болған-міс, сондықтан Тәурат заңымен лағнетті. Молдалардың айыптауы бойынша, Хазірет Ғұләм Ахмед (ә.с.) холерадан қайтыс болған-міс; басқа айыптары бойынша, әжетханада көз жұмған-міс, сондықтан оның өлімі лағнетті. Алайда, Алла сыйлаған абыройларына орай, бірінші Мәсіх те, екінші Мәсіх те бұндай өлімдерден азат.

11. Екі Мәсіхтің ізбасарлары түрлі диктаторлық режимдер кезінде аса қатыгездікпен қудаланған. Олардың көбі Мәсіхке сенгендері үшін ғана аяусыз өлтірілген болатын. Мұндай шейттік өлім алғашқы Мәсіхшілер мен Ахмади-мұсылмандары үшін зор мәртебе.


   Хазірет Мырза Ғұләм Ахмедтің (ә.с.) кезінде Үндістан молдалары тарапынан оған қарсы қарқынды оппозициялық компания пайда болды. Үндістанның екі жүз ғұламасы оны және оның ізбасарларын «кәпірлер» деп жариялайтын құжатқа қол қойған. «Танзим Хатами Набуват» (яғни, «Пайғамбарлық Мөрді қорғау») атты ұйым – Ахмадия Мұсылман Жамағатына қарсы тұру үшін құрылған, оның ішіне Исламның басқа барлық секталары кіреді. 1974 жылы Сауд Арабияның патшасы Фейсал мен оның шейхтары 140 ғұламаның басын қосып, Бүкіләлемдік Мұсылман Лигасын ұйымдастырды, онда олар өздерін Ахмадия Мұсылман Жамағатына бірауыздан қарсы екендіктерін жариялады. Сол жылы, аталмыш жиналыстың беделін жалау етіп, Пәкістаннің Ұлттық Ассамблеясы заңнамалық акт еңгізу арқылы: Ахмадилерді – «мұсылман емес», деп жарғы шығарды. Сол кездегі мәслихаттан кейін, Пәкістанның «Навай Вақт» (Nawai Waqt) газеті: Ахмадия Жамағатынан бөлек, Ассамблеяға қатысқан Исламның барлық 72 ағымдарының имамдары бұл жарғыны бірауыздан қолдады! – деп, хабар таратты.
   Осылайша, жалғыз Ахмадия Жамағатына қарсы тұру мақсатында біріккен түрлі секта молдаларының ортақ жарғысы өзіндік бір «шекара сызды», оның бір жағына жалғыз Жамағатты қалдырса, екінші жағына қалған 72 ағым жайғасып орныққан. Осы істерімен бүлікшіл-молдалар Ардақты Пайғамбарымыздың ﷺ кесімін өз бастарына төндірді, яғни: 
«Менің үмметім 73 ағымға бөлінеді, олардың барлығы Отқа тасталады, тек біреуінен басқалары»! 




Видео мәлімет: Мәсихшілік ұқсастықтар тақырыбына қосымша бейне материалмен таныс болыңыздар: «Мәриямұлы Иса мен Мырза Ғұләм Ахмед арасындағы керемет ұқсастықтар (екеуіне Алланың сәлемі болсын)».

 






______________________________________________
ХАЗІРЕТ ИСАНЫҢ (ас) АҚИҚАТЫНА ҚАТЫСТЫ МАҚАЛАЛАР:



Хазірет Исаның (ас) өліміне қатысты Құранның, хадистердің, сахабалардың
және үмметтің беделді ғұламаларының куәліктері.


«Рафаъа» (көтеру) сөзінің мағынасы.
Хазірет Иса (ас) аспанға затымен көтерілген бе?


Аллаһ «дене» емес және Оның «физикалық мекені» жоқ.
Қалайша Хазірет Иса (ас) Аллаға физикалық түрде (фәни денесімен) көтерілген?


«Нузул» (түсу) сөзінің мағынасы. Иса (ас) аспаннан түсе ме?

Иса Мәсихтың қайта келуі Ілияс пайғамбардың қайта келуіндей.


______________________________________________
БАСҚА МАҚАЛАЛАР:



Ахмадилер - мұсылман ба, мұсылман емес пе?

Ахмадилердің жиһад түсінігі.
Неге мен Исламға иланамын?
Мұхаммедтің үмметіне келетін Мәсіх пен Маһдидің белгілері.

Діннің қайта өркендеуі. (Екі түрлі көзқарасты талқылау).

Күннің Батыстан шығуы (Ақыр заманның үлкен белгілерінен).

Дәжжалдың түп мағынасы.









Нравится

Вы не можете комментировать, т.к. не авторизованы.


Islam Amanat      20-01-2015 11:10 (ссылка)
Мәсихшілік ұқсастықтар
Өз Мәсіхтерінен бас тартқа яһуди раввиндері мен мұсылман молдалары бір-біріне несімен ұқсайды? Әлгі ғұламалардың өз Мәсіхтерінен бас тартқандағы келтірген уәждері мен дәлелдерін бір-бірімен салыстыру: