Кәсіп болмай, нәсіп болмайды
Бөлісу…

Бұл жолғы саяси науқан өте қарқынды жүріп жатыр. Оны қыстың қатал ызғары да, бұрқасыны да тоқтата алар емес. Қайта олардың күш-жігерін жани түсіп, жеңіске деген ынталарын арттырған сы­ңай­лы. Сондай үгіт-насихат жұмыстарын Қазақ­стан Патриоттары партиясының мүшелері оңтүстік облыстарды аралау барысында жүргізіп қайтты. Тіпті, елорда мен оңтүстік астананың өзінде көптеген шаралар ұйымдастырылып, көп шығын жұмсамай-ақ сайлаушылардың жүрегіне жол табуға тырыс­қан­дарын да тілге тиек ете кеткен жөн.

Мысалы, Алматының «Орбита» шағын ауданынан Көк базарға дейін трамвай көлігімен жүріп, жолаушылармен әңгіме-дүкен құрудың өзі тапқырлық болса керек. Жол-жөнекей көптеген жолаушылар мініп, түсіп жатса, партия туралы мағлұмат олар­дың санасында жатталып қалмайды дейсіз бе. Осы орайда онсыз да белсенді депутат саналатын сенатор Ғани Қасымов, яғни Патриоттар партиясының серкесі соңғы кезде заң жобаларын талқылау барысында жұмысына ерекше екпін қосқандай әсер қалдырып жүр.

Жалпы, Қазақстан Патриоттары партиясы өздерін 12 жылда халықтың үміттері мен армандарын бірде-бір рет алдаған жоқпыз деп санайды. Қазақстандықтардың мүдделерін қорғау мақ­сатында ай сайын, сағат сайын нақты әрі тынымсыз саяси жұмыс жүргізіп келе жатқандық­та­рын да көлденең тартуда. Осы ретте партиялық ті­зіммен Мәжіліс депутаттығына кандидаттар қата­рын­да қоғамның әр саласынан белді азаматтардың болуы партияның беделін арттыра түскендей. Біз осы орайда Қазақстан Патриоттары партиясы бел­сен­ділерінің бірі, «Кам-Ай-сан» жауапкершілігі шек­теулі серіктестігінің директоры Ботагөз Лесовамен әңгімелескен едік.

Шағын және орта бизнеске деген салықтық же­ңілдіктерді қарастыру уақыт талабы дегенді ЖШС директоры ерекше айтып кетті. «Егер біз осы мә­селені ашық жүргізілетіндей етіп нақты тетіктерді заңдық тұрғыдан қамтамасыз етсек, онда көптеген жұмыс орындарының ашылуына игі ықпалымызды тигізер едік. Бұдан басқа, біз жалақы төлеу бағы­тын­дағы қосымша есептілікті жойып, табыстың ашық жүргізілуіне екпін берер едік», – дейді Б.Лесова.

Оның пайымынша, қазіргі таңда жеке және заңды тұлғаларға салынатын әкімшілік айыппұлдар тіп­ті де жоғары. Мәселен, жеке тұлғаларға салынатын айыппұл 40 айлық есептік көрсеткіш дең­гейінде болса, ал заңды тұлғаларға бұл мөлшер 70 пайыздық деңгейде қарастырылған. Сондықтан да көптеген кәсіпкерлер мұны төлей алмай қиналады.

Сонымен қатар, Ботагөз Дүйсенқызы шағын кәсіпте жүргендердің біраз бөлігі қыз-келіншектер мен әйелдер болғандықтан, олардың кәмелетке тол­ма­ған балаларына әлеуметтік жеңілдіктер қара­сты­ры­лса деген ойын да ортаға салды. Сол сияқты жаңадан ашылған кәсіпорын болса, оны тексеруге үш жылға дейін мораторий белгіленуі тиіс. Осылайша патриоттықтар шағын және орта кәсіп­керлер құқын қорғауда бірқатар бастамалар көте­ріп келеді. Егер партия алдағы сайлауда Мәжіліске өтсе, онда жоғарыда аталған мәселелердің оң ше­шімін табуына ықпал ететін боламыз, дейді.