Паважанае спадарства!

Галерэя сучаснага мастацтва “Ў” і кампанія LIQUI MOLY прапаноўвае ўнікальную экспазіцыю пад назвай “Картина маслом”.

Гэта выстава – эксперымент, мэта якога – паглядзець, як сродкамі традыцыйных матэрыялаў могуць быць асэнсаваны творы, якія знаходзяцца на перадавым баку беларускага сучаснага мастацтва. Фатаграфія, відэа, інсталяцыя, арт-аб’екты і жывапіс алеем. Ці адбудзецца паміж імі дыялог. Наколькі яны далёкія адзін ад аднаго? Ці могуць яны ўзаемадзейнічаць паміж сабой? Прапануем паразважаць над гэтымі пытаннямі разам з намі.

У праекце ўдзельнічаюць як вядомыя аўтары, так і маладыя мастакі. Сярод больш трыццаці ўдзельнікаў такія яскравыя асобы арт-поля як М. Гулін, А. Слабодчыкава, В. Брусінскі, Т. Сакалова, А. Лянкевіч, С. Кірушчанка, А. Некрашэвіч, З. Луцэвіч.

У рамках праекта адбудзецца шэраг майстар-класаў, прафесійных дыскусій і лекцый.

Галерэя сучаснага мастацтва “Ў” далучаецца да ініцыятывы кампаніі LIQUI MOLY у пошуку і падтрымцы маладых талентаў. Вынік гэтага ўнікальнага супрацоўніцтва будзе цікавы як прадзвінутай моладзі, так і паважанай кансерватыўнай публіцы і стане адной з яскравейшых падзей сярод мастацкіх праектаў восені.

Выстава пройдзе з 28 жніўня да 19 верасня 2010 года ў галерэі сучаснага мастацтва “Ў” (Мінск, пр. Незалежнасці, 37А)

"Купляй беларускае!" - новую песню ад "Ляписа Трубецкого" прэзентуе Adnak.by.

"Купляй беларускае, купляй сваё, выкінь у смецце самсунгі і саньё!" -- радок з прыпеву песні, якая выконваецца ад імя простага беларускага хлопца ў традыцыйным для "ляпісаў" іранічным стылі.

Хоць музыканты пасмейваюцца з намаганняў прымусіць беларусаў купляць толькі айчынныя тавары, прадусар "Ляписа Трубецкого" Яўген Калмыкоў супакойвае: "Вядома, мы купляем беларускае. Мы ж тут жывем!".

Песня "Купляй беларускае!" -- сваеасаблівы постсткрыптум і падарунак для Першага фэстывалю беларускамоўнай рэкламы "Adnak!", які скончыўся ў ліпені 2010.

Яўген Калмыкоў: "Мы не планавалі ўключаць песню ў які-кольвек альбом, бо гумар тэксту могуць зразумець толькі ў Беларусі".

Adnak.by і "Ляпісы" прэзентуюць відэашэраг да песні "Купляй беларускае!".

"Гэта не кліп, а відэаінсталяцыя. Песня нарадзілася пад час вяртання з аэрапорту "Мінск-2". Пабачаныя па дарозе кадры леглі ў аснову твору студэнта-аператара Аляксандара Галушкі, які паездзіў з камерай цягам сутак па Мінску і ваколіцах. Адзняты матэрыял лёг у аснову відэаісталяцыі," -- тлумачыць Яўген Калмыкоў.

Глядзець і слухаць "Купляй беларускае!": http://adnak.by/news/lyapis...

4 верасня у Музеі народнай архітэктуры і побыту мае адбыцца фолк-фэст «Камяніца». У гэтым годзе хэдлайнерамі мерапрыемства будуць этна-трыа «Троіца» і гурт «Палац». Сродкі ад продажу квіткоў пайдуць на рахункі музею.

Музей народнай архітэктуры і побыту знаходзіцца ў вёсцы Азярцо ў 5 кіламетрах ад Мінска (за аўтарынак «Малінаўка»). На маляўнічых лугах пад блакітным небам стаіць унікальная калекцыя помнікаў драўлянай архітэктуры 18-20 стагоддзяў з усёй Беларусі: дамы і цэрквы, млыны і гаспадарчыя будынкі.

Фестываль упершыню адбыўся год таму, сабраўшы каля 2 тысяч гледачоў. Тады музычную праграму ўзначалілі гурты Kriwi, «Стары Ольса», «Нагуаль», «Джамбібум».

«У мінулым годзе мы хутчэй спрабавалі свае сілы, таму гэтым разам мы павінны ўсё зрабіць яшчэ лепш на ўсіх узроўнях, ад транспарту да музычнай праграмы, – распавядае каардынатар фестывалю Сяргей Чыгрынец. – Акрамя хэдлайнераў будуць іншыя досыць вядомыя гурты, але галоўнае – мы шукаем новыя таленты, каб паказаць іх на нашым фэсце. Бо нешта ўсе кажуць, што новых фолк-выканаўцаў няма, але мы не жадаем верыць у гэта».

Запісы трэба дасылаць на мэйл kamyanitsa@gmail.com да 15 жніўня. Лепшы гурт абярэ аўтарытэтнае журы на чале з Алегам Хаменка («Палац») і Іванам Кірчуком («Троіца»).

Кошт квіткоў на мерапрыемства будзе звычайны для музею – 6300 руб. для дарослых, 3150 руб. для школьнікаў. Фэст працягнецца з 15 да 22 гадзіны. Папярэдняя рэгістрацыя і дадатковая інфармацыя на сайце http://fest.kamyanitsa.by. Даведка: (029) 670 13 30, (017) 507 69 37.

Нацыянальны банк Рэспублікі Беларусь 20 ліпеня 2010 г. уводзіць у абарачэнне памятныя манеты “ЕўрАзЭС. 10 год”: срэбную – наміналам 20 рублёў, пробай сплаву 925, масай 33,63 г, дыяметрам 38,61 мм; медна-нікелевую – наміналам 1 рубель, масай 14,35 г, дыяметрам 33,00 мм.

Як паведамiлi ва Упраўленнi інфармацыі Нацыянальнага банка, манеты маюць форму круга, з пярэдняга і адваротнага бакоў – выступаючы кант па акружнасці. Бакавая паверхня манет рыфлёная.
На пярэднім баку манет размешчаны: уверсе – рэльефная выява Дзяржаўнага герба Рэспублікі Беларусь і надпіс: РЭСПУБЛІКА БЕЛАРУСЬ; у цэнтры ў абрамленні беларускага арнаменту “Жыцень”, што сімвалізуе высокую ўраджайнасць, дабрабыт, – знак Еўразійскай эканамічнай супольнасці; справа – год чаканкі, злева (на срэбнай) – проба сплаву; у ніжняй частцы манет надпісы: ДВАЦЦАЦЬ РУБЛЁЎ (на срэбнай) і АДЗІН РУБЕЛЬ (на медна-нікелевай).

На адваротным баку манет размешчаны: у цэнтры ў абрамленні сцягоў дзяржаў, што ўваходзяць у склад Еўразійскай эканамічнай супольнасці, – выява зямнога шара, дзе на мацерыку Еўразія акцэнтаваны граніцы краін – членаў ЕўрАзЭС (на срэбнай манеце выява зямнога шара выканана галаграмай); па крузе надпіс: ЕЎРАЗІЙСКАЯ ЭКАНАМІЧНАЯ СУПОЛЬНАСЦЬ • 10 ГОД.

Манеты адчаканены на РДП “Казахстанскі манетны двор Нацыянальнага банка Рэспублікі Казахстан”: срэбныя якасцю “пруф”, медна-нікелевыя – “пруф-лайк”. Тыраж срэбнай манеты 3000 штук, медна-нікелевай – 3500 штук.

Памятныя манеты, што ўводзяцца ў абарачэнне, з’яўляюцца законным плацежным сродкам Рэспублікі Беларусь, абавязковым да прыёму па намінальным кошце пры ўсіх відах плацяжоў без усялякіх абмежаванняў.

15–31 ліпеня 2010 галерэя сучаснага мастацтва «Ў» прадстаўляе інсталяцыю Надзеі Макеевай Chrysalis у межах праграмы “Старт”.

Экспазіцыя Надзеі Макеевай Chrysalis створана паводле матываў апавядання Рэя Брэдбэры “Пераўтварэнне”. Апавяданне размяркоўваецца на 22 аркушах такім чынам, каб візуальна падкрэсліць кампазіцыйную змену тэксту і падмацоўваецца шэрагам разнастайных аб’ектаў: фатаграфічныя калажы, інструменты і мадэлі коканаў. “Гэта своеасаблівае пераасэнсаванне твору і развагі на тэму станаўлення чалавека на новым вітку эвалюцыі, якая змяняе арганізм з сярэдзіны і чыніць невыносны душэўны і фізічны боль, – тлумачыць Надзея. – Праект пра метамарфозы, якія адбываюцца ўнутры чалавека, пра ягонае перараджэнне і змену ўнутраных органаў у перыяд трансфармацыі. Крызаліс, Кукалка, абараняе чалавека ад вонкавага свету. Але наступіць момант, калі давядзецца выйсці вонкі. Ці можа істота, якая “вылупілася”, усё яшчэ называцца чалавекам, і як успрыме “нованароджанага” атачэнне? Найбольш чаканая рэакцыя на таго, хто моцна адрозніваецца ад іншых, – страх і агрэсія”.
Перавага чырвонага колеру, агрэсіўная форма інструментаў, фізіялагічнасць некаторых аб’ектаў – мастак не захапляецца таінствам пераўтварэння, а вобразна падкрэслівае жорсткасць і балючасць перараджэння і трансфармацыі. Аўтар не спрабуе адмовіцца ад празмернага наратыву і вобразнасці ды з гатоўнасцю мабілізуе знакавую сістэму, каб адкрыта выказацца супраць варожасці навакольнага свету.

Інсталяцыя Надзеі Макеевай Chrysalis створаная ў межах праграмы “Старт”, заснаванай галерэяй сучаснага мастацтва “Ў”. Праграма накіраваная на пошук і падтрыманне маладых аўтараў, а таксама арганізацыю ў галерэі іх першай персанальнай выставы.

Сяргей Шабохін, каардынатар праграмы “Старт”

Нагадаем, што адбываецца гэта мерапрыемства па адрасу Мiнск,
праспект Незалежнасцi 37а (ст. м. Плошча Перамогi)

Паважаныя сябры! На працягу ліпеня Галерэя сучаснага мастацтва “Ў” запрашае наведаць летні АртКірмаш (Мiнск, праспект Незалежнасцi 37а (ст. м. Плошча Перамогi). Больш за дваццаць актуальных імёнаў беларускага мастацтва. Штотыднёвае абнаўленне экспазіцыі, гарачыя дні са зніжкамі. Вы сможаце пабачыць і набыць графіку і керамічныя пласты Тамары Сакаловай, фотарэалістычны жывапіс Аляксандра Некрашэвіча, яркія працы Жанны Капуснікавай, працы Зоі Луцэвіч, палотны Руслана Вашкевіча, Міхаіла Гуліна, графіку і скульптуру Марыны Капілавай, прынты і вышытыя аб’екты Аляксея Лунёва, графіку Сяргея Балянка, фатаграфіі Артура Клінава і шмат цікавага.
Натхняйцеся і купляйце беларускае!!!



[ далей → ]