Қазақ қартын қазына деп білген. Қарияға құрмет көрсетпеуден сақтанып, ал ол абзал жандардан бата алуды мәртебе көрген халықтың ұрпағымыз. Осыны көкейге түйген Қарағанды мешіті жанынан ашылған «Жас өркен» ислами-ағартушылық ұйымы 14-наурыз күні «Ақ жаулықты аналарды құрметтейік» акциясын ұйымдастырды. Бұл ақция «Қарағанды қаласы Қазбек би ауданының үйде әлеуметтік көмек көрсету бөлімшесі» коммуналдық мемлекеттік мекемесіндегі қарт әжелерді наурыз мейрамымен құттықтауға арналды.
Үшінші топтағы мүгедек әже мен зейнеткерлерден құралған мекеме тұрғындары ілтипат пен құрметке зәру. Қарағанды орталық мешітінің наиб имамы, «Жас өркен» ұйымының жетекшісі Мерей Жақия қарттарды келе жатқан наурыз мейрамымен құттықтаған сөзінен кейін құран оқылды. Ары қарай концерттік бағдарламамен жалғасқан кеш шағын бөлмеде жиналған әжелердің бірден көңілінен шықты. Ой саларлық ғибратты көрініс қойылып, ана жайлы өлең оқылды, ән айтылды. Тәттімбет атындағы өнер колледжінің студенттері орындаған термелер мен дәстүрлі әндерді қариялар үлкен ықыласпен тыңдады. Өздеріне деген шынайы ілтипат, құрметке әз аналардың жүректері елжіреп, көздеріне жас алды.
Игі іс ұлыстың ұлы күні қарсаңында өткізіліп жатқан соң, «Жас өркен» ұйымының мүшелері әжелерге наурыз-көжеден де ауыз тигізуді ұмытпады. Дастархан басында қызықты әңгіме айтылып, екі сағатқа созылған ізгі шара соңында қарттарға сыйлықтар тапсырылды. Акцияға ат салысып, «Жас өркендіктерден» көмегін аямаған коммуналдық мекеме меңгерушісі Балқанат Дәуренбековаға мол алғыс айтылып, сыйлық тапсырылды.
Исламның игі заңымен ұштасқан қазақтың салтын қадірлеген «Жас өркен» ислами-ағартушылық ұйымы осылайша өнегелі іс жасап, туған-туысы жоқ қариялардың көңілін бір марқайтып қайтты. Жаратқан Ие жар болса, алда бұл ұйымды халыққа пайдасы тиер талай ізгі істер күтіп тұр деп сенеміз.