Акафист Пресвятей Владычице нашей Богородице в честь чудотворныя

иконы Ея Ченстоховския или Непобедимая Победа



Кондак 1

Взбранной Воеводе, Спасительнице земли Русския, похвальное приносим тебе пение, Ты же, Мати Царя Небеснаго, от всякия избави напасти страну нашу, и от всех скорбей и бед свободи во умилении зовущих Ти:

Радуйся, Непобедимая Победо, избави нас от всякаго зла и сотвори чудо спасения.



Икос 1

Ангельский собор на Небеси немолчно воспевает Тя, Владычице, и мы, земнороднии, притекающе ко иконе Твоей чудотворней, святым Лукою писанней, вопием Ти сице:

Радуйся, Мати Света Невечерняго.

Радуйся, Духа Святаго обитель священная.

Радуйся, светлое благодати познание;

Радуйся, Ангельских сил ликование.

Радуйся, Купино неопальне горящая;

Радуйся, Господа сил вечно зрящая.

Радуйся, неувядаемый Цвете нетления;

Радуйся, образе Христова Воскресения.

Радуйся, Непобедимая Победо, избави нас от всякаго зла и сотвори чудо спасения.



Кондак 2

Видящи благочестие и веру святыя царицы Елены, обретшей Крест Честный Господень во Иерусалиме, даровала еси ей, о Богомати, и икону Свою, чрез верных служителей Своих сохраненную от лет древних, да молятся пред нею выну людие, поюще Богу: Аллилуиа.

Икос 2

Разумевши святая царица Елена, яко образ сей есть благословение Божие граду царствующему, поставляше его тамо во храмине чертозей царских, идеже мнози от него исцеления прияша, поюще Матери Божией похвалы сицевыя:

Радуйся, Чаше, черплющая вечную радость;

Радуйся, Источниче, изливаяй неизреченную сладость.

Радуйся, Чертоже Рая краснейший;

Радуйся, Вертограде Христов славнейший.

Радуйся, Духа Святаго Селение;

Радуйся, врагов Божией Правды посрамление.

Радуйся, духовною радостию нас утешающая;

Радуйся, с верою Тя призывающих, не посрамляющая.

Радуйся, Непобедимая Победо, избави нас от всякаго зла и сотвори чудо спасения.



Кондак 3

Сила Вышняго храняше икону Твою, Богомати, во дни ересей от поругания, и от лютых иконоборцев погубления, и от рук варварских пленения, яко Самей ти быти Хранительницей христианом цареградским и нам поющим Сыну Твоему и Богу: Аллилуиа.



Икос 3

Имуще сокровище святыя иконы Твоея, Владычице, святии Кирилл и Мефодий просветиста земли славянския светом веры Христовы, да уведят язычницы Бога истиннаго, и прославят Матерь Божию тако:

Радуйся, державная наша Строительнице;

Радуйся, всесильная Победительнице.

Радуйся, Свободительнице плененных;

Радуйся, Покровительнице в Бозе просвещенных.

Радуйся, Ходатаице за всю Вселенную;

Радуйся, дарующая жизнь нетленную.

Радуйся, идольскаго служения избавление;

Радуйся, с Богом наше примирение.

Радуйся, Непобедимая Победо, избави нас от всякаго зла и сотвори чудо спасения.



Кондак 4

В бурныя дни смут и нестроений, спасаше икона Твоя, Пресвятая Дево, всех притекающих к ней и обретаху вси от Тебе покров и заступление, вопиюще благодарными сердцы: Аллилуиа.



Икос 4

Слышаще и зряще чудеса, являемыя от иконы Твоея, Пресвятая Богородице, князие русстии храниша от рода в род святыню сию, молящеся пред нею умиленно:

Радуйся, Агнца и Пастыря Мати нетленная;

Радуйся, Дево преблагословенная.

Радуйся, матернюю любовь нам являющая;

Радуйся, ризою честною всепокрывающая.

Радуйся, благ вечных надеждо верная;

Радуйся, Молитвеннице наша усердная.

Радуйся, Судии Всеправеднаго умоление;

Радуйся, грехов всех наших прощение.

Радуйся, Непобедимая Победо, избави нас от всякаго зла и сотвори чудо спасения.



Кондак 5

Видеша жителие града Белза грозное нападение агарян, изнесоша икону Твою чудотворную, Пресвятая Владычице, на стогны града своего и моляхуся с верою Ти о заступлении; Ты же ускорила еси тогда на помощь им, вопиющим Богу: Аллилуиа.



Икос 5

Проповедаху всюду людие о дивнем заступлении Твоем, егда нечестивии татарове стрелою уязвиша на иконе пречистый лик Твой, истекший кровию; тогда внезапу тьма и помрачение наиде на них и друг друга убиваху, бежаще вспять, вернии же зряще чудо сие воспев благохваления Ти сицевая:

Радуйся, от нашествия иноплеменник предивно избавляющая;

Радуйся, от поражения и пленения спасающая.

Радуйся, агарянскою стрелою во иконе пронзенная;

Радуйся, Мати и Дево неизреченная.

Радуйся, молящимся токи чудес источающая;

Радуйся, печаль на радость прелагающая;

Радуйся, ключу Царствия Небеснаго;

Радуйся, помощнице жития честнаго.

Радуйся, Непобедимая Победо, избави нас от всякаго зла и сотвори чудо спасения.



Кондак 6

Возсия благодать, и мрак исчезе, и возвысися рог людей христианских, яко ты, Богомати, укрепляеши веру православную, чудесы и знаменми от святыя иконы Твоея являемыми человеком, поющим Богу хваление: Аллилуиа.



Икос 6

Не восхотела еси, Мати Божия, спешешествовати отступнику от веры истинныя нечестивому князю Опольскому, иже похител бе от верных икону Твою, но избрала еси для нея гору Ясную, идеже мнози чудеса сотворила еси, приими и от нас похвалы сицевыя:

Радуйся, милости Своя на нас изливающая;

Радуйся, Владыку умилостивляющая.

Радуйся, иконою Твоею подаеши от бед сохранение;

Радуйся, христиан православных спасение.

Радуйся, злыя дела запинающая;

Радуйся, милосердие нам являющая.

Радуйся, в печалех и бедах утешение;

Радуйся, от нечаянныя смерти спасение.

Радуйся, Непобедимая Победо, избави нас от всякаго зла и сотвори чудо спасения.



Кондак 7

Хотяще оставити икону Свою во граде Ченстохове, соделала еси возок со иконою недвижимым, егда нецыя злочестивии тщахуся исхитити ю из града, но обретеся и образ Твой неукраденным; и возопиша вси славу Богу: Аллилуиа.



Икос 7

Новое чудо, на устрашение нечестивых явила еси тогда от образа Своего, Пречистая, поразивши слепотою и скорою смертию богохульников, яже икону Твою мечем уязвиша и на три части разсекоша, мы же икону сию чтуще вопием Ти:

Радуйся, Мати Божия, во иконе нас ради закланная;

Радуйся, от начала веков Предъизбранная.

Радуйся, Путеводительнице к Небу первейшая;

Радуйся, всех Ангельских сил честнейшая.

Радуйся, милосердая наша Мати;

Радуйся, неисчерпаемый святый сосуде благодати.

Радуйся, честно просящим помощь являющая;

Радуйся, доброе житие устрояющая.

Радуйся, Непобедимая Победо, избави нас от всякаго зла и сотвори чудо спасения.


Кондак 8

Всем притекающим ко иконе Твоей скорая помощница являешися, Пресвятая Дево; яко же древле, тако и ныне, заступаеши и сохраняеши чтущих Тя и поющих Сыну Твоему и Богу: Аллилуиа.

Икос 8

Странно бе войску свейскому видети, яко непобедимое доселе грозное воинство их, побеждено бысть внезапу близ града Ченстохова, заступничеством Твоим, Пречистая; мы же воспоминающе чудо сие, величаем тя:

Радуйся, Совета неизреченнаго Таиннице;

Радуйся, благодати Божией Сокровищнице.

Радуйся, иноплеменных ратей одоление;

Радуйся, от убиения и разорения спасение.

Радуйся, горняго и дольняго мира Всецарице.

Радуйся, всяческих благ подательнице.

Радуйся, от враг от бед избавление;

Радуйся, непрестанное человек удивление.

Радуйся, Непобедима Победо, избави нас от всякаго зла и сотвори чудо спасения.



Кондак 9

Весь мир христианский покрываеши омофором милости Своея, на помощь скоро к нам притекаеши, купно со святителем Николаем и святым Царем Николаем за нас пред Богом ходатайствуеши, вонми и ныне гласу молений нас, грешных, поющих Богу: Аллилуиа.

Икос 9

Ветии зломудреныя ради изрещи, колико веков не слышаще Ченстоховстеи Богородице молебнаго пения верных; но явися пред образ Ея русский Царь Петр и ему единому отверзла уста Пречистая, да воспоет той в слух мира всего похвалы истинныя:

Радуйся, светом Истины нас озаряющая;

Радуйся, руце Твоя за ны молящися, простирающая.

Радуйся, Бога и человека соединившая;

Радуйся, смертное естество безсмертием просветившая.

Радуйся, верных душ услаждение;

Радуйся, душепагубных дел удаление;

Радуйся, благочестивых христиан Окормительнице.

Радуйся, смиренномудрых благая Вседержительнице.

Радуйся, Непобедимая Победо, избави нас от всякаго зла и сотвори чудо спасения.



Кондак 10

Стена нератуема и ограждение твердое, Ты еси людем русским почитающим Тя, о Божия Мати, яко во мнозех списках иконы Твоея Ченстоховския являеши благоволение Свое: просимое во благо подаеши и гнев Божий отвращаеши от поющих Ему: Аллилуиа.



Икос 10

Спасти хотящи род человечь, Богомати, от тьмы неверия и заблуждения, яви миру свет веры православныя и токмо воинству русскому подаде одолети крепость, идеже икона Твоя чудотворная стояше. Тогда благоизволила еси, Мати Божия, со христолюбивым воинством русским отыти во град святаго Петра. Воспоминая сие, тмочисленныма устнами со умилением взываем Ти сице:

Радуйся, огнем Божественным всепросвещающая;

Радуйся, мрак греха отгоняющая.

Радуйся, жестокости наших сердец умягчение;

Радуйся, заблудщих на путь спасения возвращение.

Радуйся, стено нерушимая;

Радуйся, крепосте необоримая.

Радуйся, Небеси и земли украшение;

Радуйся, надеждо нашего Воскресения.

Радуйся, Непобедимая Победо, избави нас от всякаго зла и сотвори чудо спасения.



Кондак 11

Пение воспеваем и хвалу приносим Ти, о

Пресвятая Дево, молимся пред иконою Твоею, на ней же зрим язвы, руками нечестивых человек нанесенныя, от наших же прегрешений незаживаемыя, но имуще Тя о нас ходатаицу к Богу взываем: Аллилуиа.



Икос 11

Светоявленная икона Твоя, Богомати, сияет чудесы даже и доднесь, являя нам милость Твою, яко многажды тщахуся людие сокрыти вапы различными уязвление пречистаго лика Твоего, на сей иконе живописаннаго, но всуе трудишася изографы, яко паки проступаху язи, их же мы грехми и беззаконми нашими наносим Ти, но отпусти нам вся, Дево, и помилуй зовущая:

Радуйся, веры нерушимое забрало;

Радуйся, чудес Христовых начало.

Радуйся, врат райских отверзение;

Радуйся, тайны Божией всесильное проявление.

Радуйся, Богоприятное молитвы кадило;

Радуйся, Носящаго вся носило.

Радуйся, людскими грехми уязвленная;

Радуйся, в любве Божией утвержденная.

Радуйся, Непобедимая Победо, избави нас от всякаго зла и сотвори чудо спасения.



Кондак 12

Благодатию покрый нас, о Пресвятая Дево, исходящею от дивныя иконы Твоея, предстательством Твоим спаси и помилуй страну Русскую, в ней же чудесы многими просияла еси, и яви нам, молящимся пред образом Твоим, чудо спасения, поющим Сыну Твоему и Богу: Аллилуиа.

Икос 12

Поюще пение похвальное усты недостойными, уповаем на милость Божию и Твое, Богомати, заступление и ходатайство за нас, грешных, пред Господом, яко да дарует державе русстей на супостаты одоление, от иноплеменник и поган свобождение, Царя Православнаго во охранение, и к Царствию Небесному путевождение, и выну буди с нами, зовущими ти:

Радуйся, державу российскую в Бозе устрояющая;

Радуйся, под нозе Царя Православнаго вся покоряющая.

Радуйся, обличающая учения душевредныя;

Радуйся, призревающая на молитвы смиренныя.

Радуйся, российстей страны утешение;

Радуйся, Церкве Христовой священное украшение.

Радуйся, дарующая победы верным;

Радуйся, венчающая венцем нетленным.

Радуйся, Непобедимая Победо, избави нас от всякаго зла и сотвори чудо спасения.



Кондак 13

О всепетая Мати, рождшая всех святых святейшее Слово, призри ныне на Царство Твое земное и умоли Господа Вседержителя, да не внидет в суд с нами, но да подаст нам грехов оставление, ига бесовскаго свобождение, и Святой Руси Воскресение, верою вопиющим Богу: Аллилуиа, Аллилуиа, Аллилуиа.

(Сей кондак глаголи трижды, посем паки икос 1-й: «Ангельский собор на небеси» и кондак 1-й: «Взбранной Воеводе»)



Молитва пред св. иконою Богородицы Ченстоховскою

О Всемилостивая Госпоже, Царице Богородице, от всех родов избранная и всеми роды небесными и земными ублажаемая! Воззри милостивно на предстоящия пред святою иконою Твоею люди сия, усердно молящияся Тебе, и сотвори предстательством Твоим и заступлением у Сына Твоего и Бога нашего, да никтоже отыдет от места сего упования своего тощ и посрамлен в надежде своей; но да приимет кийждо от Тебе вся по благому изволению сердца своего, по нужди и потребе своей, во спасение души и во здравие телу. Наипаче же осени и огради покровом Твоим, Милосердая Мати, православнаго грядущаго Государя Императора нашего и весь царствующий дом Его; отжени от Него молитвами Твоими всякаго врага и супостата. Утверди житие его в мире и тишине, да и мы вси тихое и безмолвное житие поживем во всяком блазе, благочестии и чистоте; удержави царство Его, во еже быти ему царству Христову; управи пути и советы Его, да возсияет во днех Его правда и множество мира, да возрадуется сердце Его о сущих в державе Его, яко сердце отца о чадех своих веселящагося; на сопротивныя же и лукавнующия в сердцах своих посли пред лицем Его трепет, да поне страхом вразумятся и престанут от лукавств своих и противлений, творяще волю Его, яко пред Богом, от души и совести благия. Моли, милосердая Владычице, пренебеснаго Бога, да присно Церковь Свою святую соблюдет, вышним Своим Благословением архиереев наших православных укрепит, миром оградит и святей Своей церкви целых, здравых, честных, долгоденствующих и право правящих слово Своея истины дарует, от всех же видимых и невидимых врагов со всеми православными христианы милостивно избавит и во Православии и твердей вере до конца веков непоступно и неизменно сохранит. Призирай благосердием, всепетая, и призрением милостиваго Твоего заступления на все царство наше Всероссийское, царствующия грады наша, град сей и святой храм сей, - и излей на ня богатыя Твоя милости, Ты бо еси всесильная Помощница и Заступница всех нас. Приклонися к молитвам и всех раб Твоих, притекающих зде ко святей иконе Твоей сей, услыши воздыхания и гласы, ими же раби Твои молятся во святем храме сем. Аще же и иноверный, и иноплеменник, идя и проходя зде, помолится, услыши, чадолюбивая Госпоже, и сего человеколюбне и милостивно соделай, яже к помощи ему и ко спасению. Ожеточенныя же и разсеянныя сердцы своими во странах наших на путь истины настави. Отпадшия от благочестивыя веры обрати и паки сопричти святей Твоей Православней кафоличестей Церкви. В семействах людей всех и во братии нашей мир огради и соблюди, в юных братство и смиренномудрие утверди, старость поддержи, отрочество настави, мужество умудри, сирыя и вдовицы заступи, утесненныя и в скорбех сущия утеши и охрани, младенцы воспитай, болящия уврачуй, плененныя свободи, ограждая ны выну от всякаго зла благостию Твоею и утеши милостивным Твоим посещением и всех благодеющих нам. Даруй же, Благая, земли плодоносие, воздуху благорастворение и вся, яже на пользу нашу, дары благовременныя и благопотребныя, всемощным Своим предстательством пред Всесвятою живоначальною Троицею, купно со святыми избранными угодниками Ея, святителем Николаем и святым Царем-мучеником Николаем. Прежде отшедщия отцы и матери, братия и сестры наша и вся от лет древних припадавшая ко святей иконе Твоей сей упокой в селениих святых, в месте светле, в месте злачне, в месте покойне, идеже несть печаль и воздыхание. Егда же приспеет и наше от жития сего отшествие и к вечней жизни преселение, предстани нам, Преблагословенная Дево, и даруй христианскую кончину живота нашего безболезненну, непостыдну, мирну и Святых Таин причастну, да и в будущем веце сподобимся вси, купно со всеми святыми, безконечныя блаженныя жизни во царствии возлюбленнаго Сына Твоего, Господа и Спаса нашего Иисуса Христа, Ему же подобает всякая слава, честь и поклонение во веки веков. Аминь.



Тропарь, глас 4

Непобедимая Победо, Владычице Ченстоховская, древняго иже о нас благоволения Самозрительнице, будущаго спасения Хранительнице, покаянием соделай ны достойныя Грядушему Царю.